كل واحد يكتب في نص ورقة إسمو و لقبو و شنية يحب يطلع كي يكبر . 

22 عام التالي كان هذا سؤال ستي أنيسة في أول حصة تعارف في السنة الأولى, و بما أني كنت ديما في الطاولة الأولى، مش على حاجة  أما بأمور طول، رصاتلي باش نجاوب أول واحد, وقفت, أول مرة باش نحكي قدام برشة عباد, وجهي حمار و شدني الTrac , جاوبت برعشة في صوتي, ستي إسمي أمين غزواني, كي نكبر نحب نولي محامي . 
كبرت و وليت Psychologue و حكاية المحاماة طلعت طيش صغر, بعد الPsychologie عديت concours و دخلت ESAC و قريت Master pro en écriture et réalisation cinématographique . 

السينما موش كيما sciences humaines قراية تخليك منعوش طاير و تخمم Out of the Box, على ذكر BOX خدمت عامين و نص في BOX نقرا Master و نخدم فرد وقت، خدمت Copywriter خرجت شوي ملي عندي، خدمت على ماركات كبار زدت تعلمت منهم، و ديما نحاول أفكاري ما يكونوش carré, و بعد expérience عامين و نص مشيت ل Pointcarré بالضبط بالضبط  TBWA \ POINTCARRE  .

من الديجيتال لأكثر ATL و BTL ... و المسيرة متواصلة و الAdvertising يجيب .

و كي جاء الوقت باش نخدم ال PFE في السينما, جات الفرصة باش نعمل أول فيلم بالحق، فيلم صحيح موش فالصو، أما Quand même الفيلم سميتو FALSO .

الحاصيلو بين الإخراج و Copywriting، فتقت مواهبي في أوقات الفراغ، هاكا العام عملت مجلة، أول magazine communautaire local مع شبيبة في الجمعية في الكاف سميناها Siccamag, المجلة عاشت عامين و غادي وين بديت نخمم في فكرة جديدة Digital أكثر, تمشي في الpandémie, خاصة إلي شطر الجرايد و المجلات فلست, الحاصيلو عملت site web عبارة على  journal satirique électronique, قلت نحكي حكاية تفرهد في وسط زحمة الأخبار الخايبة و هذا سميتوا Bobtan news و الBebe هذا مازال عايش معايا مهنيني على الMental health .

الحاصيلو, كان فما حاجة تو تبان أما كان فمة حاجة مازالت تحب تعرفها تتعدى للCV و Portfolio .

​